محمد خلف

قطر ( انت معلم ) بلد خليجي يفرح القلب وهو مثال حي للتخطيط والرؤية الصحيحة للمستقبل ( درس مثالي ) من بين بلدان دول الخليج والدول العربية كافة !.. فبعد استضافة كاس العالم هاهي تسابق الزمن للمشاركة بكوبا أمريكا بحدث تاريخي جميل وهو بالمناسبة اول تشريف لمنتخب عربي بهذة البطولة العالمية التى يتخطي عمرها المئة عام !.. وقطر ( لك ياللي في بالي ) ايضا قدمت درس مثالي جداً في اتخاذ الصمت كموقف بعد ان اشتغلت على نفسها السنين اللي فاتت بايجاد جيل جديد بمدربهم من انتاج أكاديمية اسباير !.. وعمل قطر الجاد ثمرته ما يراه الجميع الآن وهو الوصول الي نصف نهائي بطولة آسيا لأول مرة بتاريخ مشاركاتها !.. وحنا بالكويت كل يوم بكوبة جديدة ( متعودة دايما ) مع اتحاداتنا الكروية ماركة يابخت من نفع واستنفع بتشيكلة أعضاءه القديم منها او الجديد !.. قبل كان العذر الإيقاف واليوم وش عذرنا بعد ان طاف على رفع الإيقاف سنه ( حلوه ياجميل ) اشوف يالله من فضلك الوضع على ماهو عليه لا جديد يذكر ماغير قديم يعاد سم بدنا !.. شاطرين بتسطير الكلام هنعمل ونعمل ونسوي وللاسف ماشفنا لا خطة مستقبلية ( سلق بيض ) ولا استراتيجيات ولا رؤية تخلينا نصبر حتى نشوف نتائجها !.. ياجماعة الخير الكرة حولنا تتطور أسرع من البرق وحنا عندنا أتحاد ( سلاحف ) مايعرف يحط لنا جدول صف دراسي ؟!.. ولعل إيقاف الدوري شهرين ابرزها ومع هذا للاسف فيه ناس عندنا لليوم يترجون من وراه خير !.. وأختم وأقول يا اتحاد قدمنا ترى ما فيها شي ان استلفتوا واحد من اعضاء الاتحاد القطري لكرة القدم حتى يخطط لكم لان انتم وانا أسف بهالكلام فشلتوا مثل اللي قبلكم بتطوير منتخباتنا الكروية وسلامتكم .

ترك الرد

اكتب تعليقك
اسمك الكريم