الرئيسيةكتاب الرياضيمحمد خلف الشمري : ‎استياء سامي !

محمد خلف الشمري

استياء سامي !.

‎اللي كتبه الزميل حسن موسى ونشر بجريدة الرأي الكابتن عنده حق بتعبيره عن الاستياء من تعاقدات النادي العربي مع لاعبين جدد .. وابصم له بالعشرة ورأي من رأيه بان جلب العديد من اللاعبين مو بس سيقلل من فرص الاعتماد على العناصر الشابة بالنادي بل ينهي طموحهم بالمرة .. وللاسف يابو محمد ان هذا المتبع باغلب أندية الكويت مو بس بالعربي لان انديتنا صار عينها وعين اللي يلعب بالأندية الثانية اول مايسمعون عن لاعب تألق بمباراة قاموا يزاودون عليه .. علما بان بعض اللي عندهم من اصحاب المهارات ولكن للأسف مدفونة ومنسية ينتظرون عين خبيره تبرزهم .. وكم واحد واحد سمعنا قصة نجاحه بعيدا عن ناديه الأصلي بِعد الاستغناء .. من وجهة نظري العربي فشل فشلا ذريعا بجلب اللاعبين المحليين وحتي لا ننسي اذكركم ان كنت ماني غلطان قبل موسمين او ثلاثة تم جلب حوالي عشرة لاعبين بمراكز مختلفة بالنادي !.. وش كانت النتيجة ؟.. بقى الوضع على ماهو عليه لا جديد يذكر !.. وغير هذا اتمني لو تقولون لي كم واحد منهم اليوم بصفوف الفريق الاول ؟.. متهيالي ثالثه او اربعه والباقي اختفوا مع مرور الأيام لضعف المستوي هذا من جهة .. وأما من الجهة الثانية لتكملة استيائك فأنا ضد كلامك اللي تقول فيه انك مستاء من التعاقد قبل توليك مهمة إدارة كرة القدم .. معقولة يا كابتن ياكبير تفكيرك يوصل الي هالمحدودية بأنك تتشره بأنهم من المفروض يأخذون رأيك بعد تعينك بمنصب مدير الكرة والله خوش سالفة عجل وش خانت وجود المدرب بالفريق ؟.. اخاف انه مجرد اسم مدرب لا اكثر يا كابتن دول العالم المتقدمة بكرة القدم المدرب هو الكل بالكل .. هو المسؤول الاول والله والأخير وهو من تقع على عاتقه طلب اللاعبين اللي محتاجه فريقه لانه هو المدير الفني ويعرف نواقص فريقه !.. وأما الاداري اداري مو اكثر لان مهامه ادارية بحته ومن غير المعقول السفينه يقودها ربانين وسلامتكم .

‎الووو اخير : «نوخذاوين طبّعوا مركب»

لتحميل تطبيق جريدة الرياضي

لنظام اجهزة اندرويد

لنظام اجهزة ايفون وايباد

 

الاكثر مشاهدة