الرئيسيةكتاب الصحف اليوميةمحمد خلف : القلوب كلها وياك يالازرق

محمد خلف

عالم اليوم :

 القلوب كلها وياك يالازرق

– توكل يالازرق على الله هذا واجب علينا ان نقوله بعد ان ظهرت قائمة المشاركين بالعرس الخليجي لان اللي صار صار .. وخلونا نبعد غصب عنا حبا بالكويت عن سالفة استبعدوا فلان الهداف وعلان وضموا فلنتان وملوك الاحتياط .. لان هالكلام ماراح يوكلنا خبز ولا تشكن فيليه وخلونا نصرخ بعالى الصوت القلوب كلها وياك يالازرق .
 
***
– قلبي معاكم يا اهل نادي برقان انتم من صجكم تطالبون اتحاد القدم انه يشركم في بطولة كاس الامير .. بالاول خلوه يعترف فيكم ويضمكم لاتحاده وبعدين طالبوا بالمشاركة والوووو يا ناديا العيون وسلوى وراكم ساكتين عن حقكم .. تدرون خلونا نصرخ بعالى الصوت القلوب كلها وياك يالازرق .
 
***
– كشط والا مو كشط والله خوش سالفة صايره بين نادي الجهراء ونائب رئيس الهيئة العامة للشباب والرياضة .. يا بوكم اللي بالجدر يطلع ملاس القضاء تري السالفة مصخت كل يوم سالفة جديدة بس ياليت توضحون شنهو تقصدون بسالفة ينفذ اجندات غير مفهومة ضد ادارة الجهراء ؟ ..   ولهذا ارجو منكم هاليومين لين يحين موعد القضاء ترددون معانا بعالى الصوت القلوب كلها وياك يالازرق .
***
– دعوه طيبه دعاها رئيس الاتحاد الاسيوي للصحافة الرياضية والامين العام لجائزة شبكة قنوات الكاس لافضل تغطية لخليجي 22 فيصل القناعي جميع الصحافيين في الخليج والصحف الخليجية للمشاركة بفاعلية في النسخة الرابعة من المسابقة .. دعوه طيبه من رجل طيب بس للاسف مالها اي صدي بصحفنا المحلية لانها صحف (مافيش) قليلة الحيلة وماعندها القدرة على مواكبة الاشقاء الخليجيين لقل المتخصصين فيها ولهذا انصح اهل صحافتنا انهم يرددون بعالى الصوت القلوب كلها وياك يالازرق .
ألووو اخير : مصيرنا واحد وشعبنا واحد يعيش يعيش فليعيش الله اكبر خليج ضمنا انا الخليجي انا الخليجي وافتخر اني خليجي انا خليجي .. كلمات تربينا على سمعها من يوم حنا اطفال بس اليوم للاسف صارت كلمات طربية تنرقص عليها لا اكثر .. لان وش تفسرون لي نقل تلفزيونات الخليج لاحداث الدورة إلا قناتي ابوظبي ودبي ؟ ! .. اكيد الماده النقدية طغت وتحكمت بمصير اهل الخليج وانا الخليجي .

لتحميل تطبيق جريدة الرياضي

لنظام اجهزة اندرويد

لنظام اجهزة ايفون وايباد

 

الاكثر مشاهدة